Nobel mükafatı laureatı Əziz Sancar Azərbaycanda görüşlər keçirir
Nobel mükafatı laureatı türkiyəli alim professor Əziz Sancar elmi nailiyyətlərinin zəhmət hesabına əldə edildiyini deyib: “Mən etdiyim işi hamıya tövsiyə etməzdim. Həyatda başqa şeylər də var, onları da etməyə çalışın. Amma iddialı alim olmaq istəyirsinizsə, çox çalışmalı olacaqsınız. Başqa çıxış yolu yoxdur”.
Professor Sancar Azərbaycan Milli Elmlər Akademiyasının dəvəti ilə gəldiyi Azərbaycanda gənclərin nümayəndələri ilə görüşüb. Bakı Yunus Əmrə İnstitutunun təşkilatçılığı ilə keçirilən görüşdə Sancar gənclərə məsləhətlər verib, sualları cavablandırıb.
Alim çıxışında Yunus Əmrə İnstitutunun fəaliyyətindən bəhs edib və institutun türk dünyası üçün xüsusi əhəmiyyət kəsb etdiyini qeyd edib. Sancar Yunus Əmrə İnstitutunun dünyanın bir çox yerindəki filiallarını görməkdən çox məmnun olduğunu bildirib. O, institutun türk mədəniyyətini təmsil etdiyini və gələcək nəsillərə ötürdüyünü vurğulayıb.