Nyu-York. 26.02.2022
Sənəd Rusiyanın BMT Təhlükəsizlik Şurasının Ukrayna ilə bağlı qəbul etdiyi qətnamənin qarşısını almasına cavab olaraq yayılıb
Rusiyanın BMT Təhlükəsizlik Şurasının Ukrayna ilə bağlı qəbul etdiyi qətnamənin qarşısını almasına cavab olaraq 43 ölkə birgə bəyanat yayıb və onun mətnini ABŞ-ın BMT-dəki sözçüsü Linda Tomas-Qrinfild açıqlayıb.
“Rusiyanın veto qoyduğu qətnamə layihəsi dövlətlərin BMT Nizamnaməsinin həyata keçirilməsinə və BMT Təhlükəsizlik Şurası vasitəsilə beynəlxalq sülh və təhlükəsizliyin təmin edilməsinə inamına dair çox mühüm sənəd idi”, – amerikalı diplomat bildirib.
ABŞ nümayəndəsi Rusiyanı BMT-də veto hüququndan sui-istifadə etməkdə ittiham edib. Tomas-Qrinfild Ukraynadakı vəziyyətə toxunaraq deyib: “Bu məsələdə təcavüzkar prezident Putindir. Başqa variant yoxdur”.
O, Ukrayna ilə bağlı qətnamə layihəsini dəstəkləyən bütün ölkələrə təşəkkür edib.
“Rusiyanın bu məsələdə veto qoymasının heç bir əsası yoxdur. BMT Baş Assambleyasında məsələ qaldıracağıq. Dünya ölkələri mövcud vəziyyətə görə Rusiyanı məsuliyyətli hesab etməkdə davam edəcək”, – diplomat qeyd edib.
Rusiya BMT Təhlükəsizlik Şurasının Ukraynaya hücumun dərhal dayandırılmasını tələb etdiyi qətnamə layihəsinə veto qoyub. Qətnamənin lehinə 11 üzv ölkə səs verib, üçü (Çin, Hindistan və BƏƏ) bitərəf qalıb. Qətnamə layihəsi ABŞ və Albaniya tərəfindən maliyyələşdirilib.
Mətndə qeyd olunub ki, “BMT Təhlükəsizlik Şurası BMT Baş katibinin Rusiya Federasiyasına Ukraynaya qarşı hücumu dayandırmaq çağırışını dəstəkləyir”. “BMT Təhlükəsizlik Şurası Rusiya Federasiyasının Ukraynaya qarşı təcavüzü ilə bağlı dərin təəssüfünü ifadə edir”, mətndə deyilir.
Layihəyə görə, Rusiya dərhal, tamamilə və ilkin şərt olmadan bütün qüvvələrini Ukraynanın beynəlxalq səviyyədə tanınmış sərhədlərindən kənara çıxarmalı idi.
Rusiyanın Ukraynaya təcavüzü
Fevralın 24-nə keçən gecə Rusiya prezidenti Vladimir Putin Ukraynanın Donbasında xüsusi hərbi əməliyyatın başlandığını elan edib.
Bunun ardınca rus ordusu Ukraynaya hücum etdi. Ukrayna şəhərləri, o cümlədən Kiyev raket və bomba hücumlarına məruz qalıb.
Ukrayna prezidenti Vladimir Zelenski cavab olaraq bildirib ki, bütün ölkədə hərbi vəziyyət tətbiq olunur.
Ukrayna lideri Rusiya ilə diplomatik əlaqələrin kəsildiyini də açıqlayıb.
Kremlin hərəkətləri BMT-də və dünyanın əksər paytaxtlarında pislənilib.
Rusiyaya qarşı sərt sanksiyalar tətbiq edilib.
Vahidov Qurban. Araşdırmaçı – analitik. İrəvan Türk Cumhuriyyəti Millət Şurası və Strateji Araştırmalar Komisiyasının üzvü