Milli Kəşfiyyat Təşkilatı (MİT) Suriyanın şimalındakı Qamışlı bölgəsində PKK terror təşkilatının liderlərindən biri, İnterpolun qırmızı xətti ilə axtarışda olan Əbdürrəhman Çadırcını zərərsizləşdirib.
Ankaradakı təhlükəsizlik strukturlarındakı mənbələrdən verilən məlumata görə, Çadırcı “Esad Fəraşin” çağırış kodu adlndan istifadə edərək, Avropa ölkələrində terror təşkilatının sıralarında fəaliyyət göstərib. Terrorçunun Avropa ölkələrindəki hərəkətləri Türkiyə xüsusi xidmət orqanları tərəfindən diqqətlə izlənilib. “Esad Fəraşin” tez-tez Avropanı gəzir, ərazini yalnız terrorçuların toplantılarında iştirak etmək üçün tərk edirdi.
Bu günlərdə MİT-ə Suriyanın şimalında yerləşən Qamışlı şəhərində terrorçunun olması barədə məlumat daxil olub. PKK liderinin məhv edilməsi üçün əməliyyat hazırlanaraq həyata keçirilib.
Əbdürrəhman Çadırcı yarandığı andan qanlı təşkilatın üzvü olub, 1997-1999-cu illərdə Avropada fəaliyyət göstərib, 2000-ci ildə isə İraqın şimalındakı Qəndil dağı ərazisində terrorçuların bazalarına köçüb. O, Türkiyə tərəfindən beynəlxalq axtarışa verilib və 2001-ci ildən İnterpol tərəfindən axtarışa verilib.
2008-10-cu illərdə bu terrorçu Moskvada PKK-nın məsul şəxsi kimi fəaliyyət göstərib. Çadırcı 2018-ci ildən PKK-nın idarəçiləri sırasındadır.
Prezident Rəcəb Tayyib Ərdoğan bildirib ki, PKK yaraqlılarının Türkiyədə ilk dəfə qanlı cinayət törətdiyi 1984-cü ildən bu yana on minlərlə türk təhlükəsizlik qüvvələri və mülki vətəndaş bu qanlı təşkilatın əli ilə həlak olub.
ABŞ və Avropa Birliyi PKK-nı terror təşkilatı kimi tanıyıb.
Ankaranın vəziyyəti həll etmək üçün yollar tapmaq cəhdlərinə baxmayaraq, PKK terror təşkilatı 2015-ci ilin iyulundan yenidən silahlı hücumlara başlayıb.
Son illərdə PKK bölgədəki qanlı cinayətlərə görə məsuliyyəti öz qollarına yükləməyə çalışır. Suriyada PKK terrorçuları PYD və YPG adları ilə ört-basdır edirlər və son iki ildə özlərini “Suriya Demokratik Qüvvələri” adlandırırlar. İranda PKK Kürdüstan Azad Həyat Partiyası (PJAK) kimi fəaliyyət göstərir.