2021-ci il iyunun 15-də işğaldan azad edilmiş Şuşa şəhərində Türkiyə və Azərbaycan prezidentləri Rəcəb Tayyib Ərdoğan və İlham Əliyev ikitərəfli münasibətləri görünməmiş müttəfiqlik səviyyəsinə qaldıran tarixi Şuşa Bəyannaməsini imzaladılar.
“Türkiyə Respublikası ilə Azərbaycan Respublikası arasında Müttəfiqlik Münasibətləri haqqında Şuşa Bəyannaməsi” adlı sənəddə tərəflərin qardaş ölkələrin müstəqilliyi, suverenliyi və ərazi bütövlüyünün qorunması üçün qarşılıqlı dəstək verməyə və birgə fəaliyyət göstərməyə hazır olduqları vurğulanıb.
Şuşa Bəyannaməsi Türkiyə ilə Azərbaycan arasında “müttəfiqlik” ifadəsinin qeyd edildiyi ilk belə sənəd idi. O, beynəlxalq təşkilatlarda mühüm məsələlərdə bir-birinə hərtərəfli dəstək verilməsini, hərbi, müdafiə, enerji, nəqliyyat, iqtisadi və humanitar sahələrdə əlaqələrin dərinləşdirilməsini nəzərdə tutur.
Prezident Ərdoğan bəyannaməni münasibətlər üçün “yol xəritəsi” və “bölgədə yeni təcavüzün qarşısının alınmasının təminatı” adlandırıb. Sənəddə türk dünyasının inkişafı və mədəni irsin populyarlaşdırılması üçün əməkdaşlığın vacibliyi qeyd olunur.