11.01.2022
ANKARA
Qazaxıstanda sabitlik və təhlükəsizlik təkcə türkdilli dövlətlər üçün deyil, bütövlükdə dünya üçün vacibdir. Qazaxıstan mövcud çağırışların öhdəsindən gəlmək üçün bütün imkanlara və təcrübəyə malikdir.
Bunu çərşənbə axşamı Türkiyənin xarici işlər naziri Mövlud Çavuşoğlu Türk Dövlətləri Təşkilatına üzv ölkələrin xarici işlər nazirlərinin Qazaxıstandakı vəziyyətlə bağlı videokonfrans vasitəsilə fövqəladə iclasında deyib.
İclas iştirakçıları Qazaxıstanda iğtişaşlar zamanı həlak olanların xatirəsini bir dəqiqəlik sükutla yad ediblər.
Çavuşoğlunun sözlərinə görə, Türkiyə Qazaxıstanda baş verənləri diqqətlə izləyirdi.
Türk Dövlətləri Təşkilatının Xarici İşlər nazirləri Qazaxıstandakı vəziyyəti müzakirə edirlər
“Biz Qazaxıstanda vəziyyətin sabitləşməsindən razıyıq. Ölkəmiz qardaş Qazaxıstanın mümkün dəstəyinə hazırdır. Problemləri həll etmək üçün türkdilli dövlətlər birləşməlidir. Türk Dövlətləri Təşkilatı ölkələrimizin inkişafı və rifahı üçün ən yaxşı platformadır”, – deyə türkiyəli nazir bildirib.
Diplomatiya rəhbəri qeyd edib ki, Qazaxıstanda baş verən faciəli hadisələr təşkilata üzv olan bütün ölkələrin ictimaiyyətini dərindən sarsıdıb. “Türk dünyası böyük bir ailədir və ölkələrimiz vahid bir bütünün parçasıdır”, – Çavuşoğlu bildirib.
Türkiyənin Xarici İşlər naziri türk dünyasını bədənlə müqayisə edib: “Yara ilə bütün bədən ağrıdığı kimi, Qazaxıstanda baş verənlər də Türkiyədə böyük kədərə səbəb olub”.
Çavuşoğlu qazax xalqının böyük şairi Abay Kunanbayevin “Birliyə gedən yol birlikdir!” sözlərini sitat gətirib.
Nazir türk dünyasında, o cümlədən iqtisadi sahədə əlaqələrin inkişafının vacibliyinə diqqət çəkib. “Türk Dövlətləri Təşkilatına üzv dövlətlər arasında ticarət dövriyyəsi tezliklə ölkələrimiz arasında ticarətin ümumi səviyyəsinin 10 faizinə çatmalıdır”, – nazir bildirib.
Çavuşoğlu bildirib ki, bugünkü görüşdən sonra türk dövlətlərinin Qazaxıstanla həmrəyliyini əks etdirən birgə bəyanat qəbul ediləcək.
Transqafqaz.com